Die Burger | Sport | Man U is ’n berg voor Chiefs

Kaapstad. - Die Vodacom-uitdaagtoernooi kan straks die letsels ontbloot wat die Cristiano Ronaldo-sage op Manchester United se voorseisoense sokkervoorbereiding gelaat het.

Die Engelse Premierliga- en Kampioeneliga-wenner speel vandag op Nuweland in die eerste wedstryd van die jaarlikse toernooi teen die Suid-Afrikaanse spogspan Kaizer Chiefs.

Ronaldo, wie se 42 doele ’n groot rol in die Rooi Duiwels se sukses van die vorige seisoen gespeel het, word met ’n skuif na Real Madrid verbind.

Hoewel United nie sy Portugese vleuel wil verkoop nie, het die speler al verskeie kere in die media gesê hy wil graag in Spanje speel.

Die United-breier, Alex Ferguson, het vroeër vandeesmaand met Ronaldo vergader. Volgens hom sal hy ’n United-speler bly.

“Ons vergadering het baie goed verloop.

“ Daar was nie probleme nie, en en hy sal dié seisoen ’n Manchester United-speler wees,” het Ferguson gesê.

“Ons albei het ons menings gegee – waar hy staan en waar ons staan.

“Ek kan met sekerheid sê hy gaan ’n Manchester United-speler wees. Ons gaan hom nie verkoop nie.”

Volgens hom het Ronaldo ’n kontrak met United en hy was nie bang dat hy in die afseisoen sou verhuis nie.

“Ek was met vakansie, en glo my, ek was nie van plan om dit kort te knip nie.

“Dit was nie ’n moeilike situasie nie. Hy het ’n kontrak met Manchester United en ons het die hef in die hand.

“Wat ons tot dusver goed gedoen het, is om niks te sê nie. Ek en Cristiano se vergadering is privaat.

“Ek het hom verlede week in Portugal gaan sien, en ons het in ’n goeie gees vergader. Dit is hoe ons die seisoen gaan afskop.”

Ronaldo het vanweë sy deelname vir sy geboorteland in die Euro2008-toernooi nie saam met sy spanmaats na Suid-Afrika gereis nie. Hy het ook ’n enkeloperasie gehad en sal tot Oktober op die kantlyn wees.

“Ons gaan hom genoeg tyd gee om te herstel en sal wag tot hy 100% reg is voordat hy weer uitdraf,” het die Skotse breier gesê.

Of Ronaldo nou hier is of nie, staan United vandag soos Tafelberg voor die Chiefs-spelers en hul afrigter, Muhsin Ertugral.


	Kontak ons \| Navrae \| Teken in op ons nuusbrief \| Vrae oor registrasie \| Adverteer \| gebruikersooreenkoms \|