Met die Gereformeerde Kerke se (finale) besluit dat vroue nie in kerklike ampte mag dien nie, het die GKSA homself verder in ’n baie klein nismark in gemaneuvreer.

Die totale lidmaatskap, wat gemeentes in Namibië en Zimbabwe insluit, is maar sowat 101 000 en dié getalle is aan die krimp.

Die Doppers wroeg al langer as twee dekades oor die kwessie. In 2003 het die sinode besluit vroue mag diakens wees. Dié besluit is in 2006 omgekeer, maar vroeër vanjaar op die algemene sinode weer herstel.

Dit was duidelik nie ’n maklike taak om te besluit watter van die twee denkskole reg is nie, want in ’n studie deur die kerk se eie Teologiese Vereniging is bevind albei standpunte is in lyn met Bybelvoorskrifte – party tekste dra net meer gewig as ander.

Die GKSA se besluit het baie mense teleurgestel, heelwat van hulle in eie geledere. Probleme wat uitgelig is, sluit in dat gemeentes doodbloei, dat die GKSA gawes ontbeer wat die Here aan die kerk gegee het en dat daar ’n tekort aan manlike leiers is.

Die GKSA se algemene sinode het ’n raamwerk gekies wat ál meer bots met diegene wat hy bedien. Dit is jammer, want Skriftuurlik is daar volgens die kerk self nie genoeg gronde om die besluit werklik te regverdig nie.