New York. – Angelina Jolie is die topverdiener onder Hollywood-aktrises nadat sy die afgelope jaar $27 miljoen (sowat R210 miljoen) in die sak gesteek het.

Sy het haar lewensmaat, Brad Pitt, se eksvrou, Jennifer Aniston, geklop, wat $25 miljoen (R195 miljoen) verdien het, het Forbes.com bekend gemaak.

Die meeste van Jolie se inkomste is uit haar deel van die wins uit haar aksiefliek Wanted, maar sy het ook vir haar rol in Salt ’n groot voorafbetaling ontvang.

Jolie en Pitt het ses kinders.

Aniston het die meeste van haar miljoene uit die romantiese komedie Marley and Me en haar komende rolprent, The Baster, gemaak.

“Aniston verdien ook steeds geld uit (herhalings van die TV-reeks) Friends en sy kry ’n lekker tjek vir haar bemarking van Glacéau se SmartWater,” het Forbes. com berig.

Meryl Streep is in die derde plek met $24 miljoen, waarvan die meeste uit haar rol in Mamma Mia kom, terwyl Sarah Jessica Parker met $23 miljoen vierde is ná die fliekweergawe van die TV-reeks Sex and the City. Cameron Diaz beklee die vyfde plek nadat sy tussen Junie 2008 en Junie 2009 $20 miljoen verdien het.

Forbes.com het gesê hy het met agente, bestuurders, vervaardigers en prokureurs gepraat om uit te werk wat aktrises vooraf betaal is vir flieks wat hulle tans maak en wat hulle sou kon verdien het teen die tyd dat die rolprente in teaters begin draai. Inkomste uit parfuum of klerereekse is ook bygetel.

“Soos wat steeds tipies is vir Hollywood, het ons aktrises aansienlik minder as hul manlike eweknieë verdien,” het Forbes. com gesê en uitgewys dat Harrison Ford, die akteur wat die afgelope jaar die meeste verdien het, $65 miljoen (sowat R510 miljoen) ryker geword het.