Die Burger | Nuus: Buiteland | ‘God van heelal huil’ oor geweld in Gasastrook

Die tradisionele militêre taktiek van ’n verrassingsaanval was eergister die rede waarom die meeste Palestyne op een dag in meer as 20 jaar in ’n Israeliese lugaanval gesterf het.

Intelligensieverslae, wat selfs deur Egipte onderskryf is, het daarop gedui dat Israel sy teenaanvalle vir eers afgelas het in reaksie op verskeie missielaanvalle deur Palestina. Dít het daartoe gelei dat verskeie hooggeplaastes van Hamas, die Palestynse bevrydingsbeweging, uit hul ondergrondse bunkers gekom het om ’n militêre parade in Gasastad by te woon.

Dié paradegrond was een van die heel eerste teikens van die Israeliese F-16-vegvliegtuie. Die grootste aantal ongevalle was ook dáár, terwyl etlike ander militêre installasies van Hamas met die grond gelyk gemaak is, het Debkafile, ’n Israeliese intelligensie-webblad van oud-Mossad-lede, gister berig.

Teen gistermiddag het die Palestynse dodetal op nagenoeg 280 gestaan, terwyl meer as 600 beseer is. Een Israeli is dood en nog sewe beseer in ’n teenaanval van Hamas-missiele.

Hamas het vroeg gisteroggend sy Grad Katusha-missielbasis geaktiveer. Die eerste missiele het teikens meer as 40 km vanaf Gasastad in Israel getref. Voor tienuur gisteroggend is 111 van dié en ander vuurpyle op Israel afgevuur.

Dít het die Israeliese verdedigingsminister, mnr. Ehud Barad, genoop om te dreig dat Israel tot ’n grondaanval sal oorgaan om dié installasies te verwoes.

Luidens Debkafile was die oorgrote meerderheid ongevalle lede van Hamas, maar beeldmateriaal het ook kinderlykies en gewonde kinders, wat pas uit die skool gekom het, gewys.

Gasastad se tonnelstelsel, wat dien as wapenopslagplekke en store vir Hamas se projektiele, strek oor meer as 80 km. Dit word lank reeds ook gebruik vir die inskeping van voorrade soos kos en medisyne nadat Israel die afgelope 18 maande ’n ferm hand gehou het op voorrade na die Palestyne.

’n Skietstilstand tussen Israel en Hamas die afgelope ses maande het verlede week tot ’n einde gekom, waarna laasgenoemde bykans onmiddellik sy aanvalle op Israel hervat het.

Wêreldleiers en -organisasies het gister wyd die konflik tussen die twee partye veroordeel en hulle tot vreedsame bemiddeling gemaak.

Pres. Kgalema Motlanthe het sy stem by dié van mnr. Ban Ki-moon, sekretaris-generaal van die Verenigde Nasies, gevoeg en Israel én Hamas gewaarsku dat geweld geen oplossing is nie.

Motlanthe het ’n beroep op die internasionale gemeenskap gedoen om alles in die stryd te werp om ’n tweestaat-oplossing te help vind waardeur Palestina én Israel vreedsaam kan voortbestaan. Ban het gesê hy verstaan Israel se frustrasie met Hamas se volgehoue aanvalle, maar het Israel vermaan om gehoor te gee aan internasionale riglyne oor minimum geweld.

Emeritus-aartsbiskop Desmond Tutu het die situasie opgesom: “Die God van Israel én van Palestina – die God van die heelal – huil, want Hy is ’n God van geregtigheid en liefde.”

Israel het teen gistermiddag altesame 230 teikens in Gasastad getref, terwyl Egipte se regering die konflik deur bemiddeling probeer beëindig het.

Die Arabiese Bond se buitelandse ministers vergader vandeesweek in Egipte, waar die Midde-Oosterse krisis bo-aan die agenda is, berig Sapa-AFP.


	Kontak ons \| Navrae \| Teken in op ons nuusbrief \| Vrae oor registrasie \| Adverteer \| gebruikersooreenkoms \|