Zimbabwiërs het al in opstand probeer kom by wyse van optogte deur die strate van Harare, maar pres. Robert Mugabe se ystervuis het dit telkens gewelddadig onderdruk.

Selfs die MDC-leier, mnr. Morgan Tsvangirai, het al by die dood omgedraai nadat hy disnis geslaan is deur lede van Mugabe se “veiligheidsmagte” – hulle is immers veronderstel om na die hele bevolking se veiligheid om te sien, ongeag mense se politieke oortuigings.

Prof. John Makumbe van die Universiteit van Zimbabwe het verlede week op ’n byeenkoms van die Instituut vir Geregtigheid en Versoening in Kaapstad gewaarsku teen ’n opstand: “Ek dink God het ons gebede verhoor en geweld gekeer, want mense wat geweld pleeg, sal reg in Zanu-PF se lokval inloop. Hulle sal maklik 50 000 mense doodskiet sonder om ’n oog te knip.

“Die beste ding wat Zimbabwiërs kan doen, is om die pad te vat Suid-Afrika en Botswana toe, totdat daardie regerings vir Mugabe sê: ‘Ons het nou genoeg gehad’.”

Die talle vrae rondom die dood van mnr. Elliot Manyika (53), minister sonder portefeulje en Zanu-PF se nasionale kommissaris, is nog ’n bewys dat Mugabe nie skroom om andersdenkendes uit die weg te ruim nie, selfs in sy eie partygeledere.

Manyika is Donderdag in die land se nasionale heldeakker ter ruste gelê. Mugabe het die geleentheid gebruik om ’n vurige politieke toespraak te maak.

Manyika se broer, mnr. Allen Manyika, het aan rouklaers op sy begrafnis gesê sy broer is vooraf deur verskeie mense gewaarsku dat hy nie lewend sal terugkeer van ’n reis na Gwanda waarop hy vertrek het nie.

Elliot Manyika se Mercedes-Benz het van die pad geloop, maar wat daarna alles met hom gebeur het, wemel van teenstrydighede.

Makumbe se kommentaar: “Een van die stories wat die ronde doen, is dat hy met Mugabe geargumenteer het en aan hom gesê het: ‘Hoe durf jy daardie belaglike ooreenkoms (met die MDC) onderteken?’

“Mugabe en mense wat saam met hom werk, het blykbaar besluit Elliot ‘moet gaan’. En hy het nogal vinnig gegaan. Sy lyk het nog baie goed gelyk. Dit kon nie weens die motorongeluk gewees het nie.

“En jy is vry om my aan te haal.”