Alle oë is vandeesweek met die Demokratiese Party se nasionale konvensie op sen. Barack Obama, maar Amerika hou asem op om te sien of die Clintons die mantel van die party se supersterre sonder drama gaan oorgee.

Obama se toespraak om die party se benoeming vir die presidentskap te ontvang, geskied Donderdag voor 76 000 toeskouers in die Denver-voetbalstadion, maar die fokus is eers op wat vooraf in die Pepsi-sentrum gaan gebeur.

Sen. Hillary Clinton, die hoofspreker môre, se toespraak word wyd afgewag. Die vraag is of sy haar steun – en dus ook die steun van haar 21 miljoen kiesers – vierkant aan Obama gaan toesê, en of sy die twyfel oor Obama wat sy by die volk geplant het, verder gaan voed.

Daar word wyd bespiegel dat Clinton en haar man, oudpres. Bill Clinton, die Obama-partytjie wil kaap. As sen. John McCain, die Republikeinse kandidaat, Obama vanjaar klop, is haar kans om in 2012 president te word soveel makliker.

Bill Clinton, wat net soveel twyfel oor Obama geskep het, se toespraak volg Woensdag.

Ironies genoeg wil Obama die week gebruik om homself aan Amerika voor te stel as ’n vurige patriot, soos Bill Clinton in 1990 gedoen het.

Slaag hy nie daarin om die beeld as popster wat McCain van hom geskep het, te vernietig nie, is sy paadjie na die Withuis bitter moeilik.

Sen. Clinton sal ingevolge ’n ooreenkoms tussen die twee kampe amptelik as ’n Demokratiese presidentskandidaat naas Obama voorgestel word, waarna sy simbolies haar afgevaardigdes se steun aan hom sal verklaar.

Die amptelike verwagting is dat Hillary Clinton nie haar politieke keel sal afsny deur reguit teen Obama te velde te trek nie. Die partybestuur sal soos een man teen haar opstaan en boonop skuld sy nog $23 miljoen – wat die kiesers moet help betaal.

Die oë is eerder op die gedrag van haar afgevaardigdes en ondersteuners. Van hulle het reguit gesê hulle gaan vir haar stem. Die Clintons het ’n “sweep-span” saamgestel om van haar eie oproerige aanhangers vas te vat.

Obama se visepresi­dents­kandidaat, sen. Joe Biden, sal die konvensie Woensdag afsluit.