Oudpres. Thabo Mbeki se uitroepteken-belaaide brief vroeër vanjaar aan pres. George W. Bush dat Amerika sy neus uit Afrika se sake moet hou, het nie permanen­te skade aan betrekkinge gedoen nie.

Mnr. Eric Bost, Amerikaanse ambassadeur in Suid-Afrika, sê Amerika beskou Suid-Afrika as ’n “baie belangrike strategiese vennoot”.

Mbeki se laatnagbrief is nie meer ter sprake nie.

“Ons glo dat ons hier en wêreldwyd wedersydse belange het. Ek kan die versekering gee dat alle pogings aangewend sal word om daardie betrekkinge te versterk,” het Bost aan die Suid-Afrikaanse Instituut vir Internasionale Aangeleenthede gesê.

Hy noem veral Suid-Afrika ­se rol in die Suider-Afrikaanse ­Ont-wikkelingsgemeenskap, die Verenigde Nasies, die Afrika-unie, asook as handelsvennoot en oor kwessies soos demokrasie en mediavryheid as redes hoekom Amerika goeie betrekkinge as van strategiese belang beskou.

En as hy die “politieke teeblare” reg lees, is mnr. Jacob Zuma ons volgende president. “Ek het die geleentheid gehad om mnr. Zuma na die Verenigde State te nooi. Hy kan baie trots wees op die manier waarop hy daar opgetree het,” het hy gesê.

Bost het aan Die Burger gesê dit is bog dat dr. Condoleezza Rice, Amerikaanse minister van buitelandse sake, nie saam met Zuma afgeneem is nie.

Hy het twee sake genoem wat hom in Suid-Afrika pla. Die een is dat Suid-Afrikaners volgens hom net “praat en praat en praat” en dink dit is die oplossing vir ’n saak. “Zimbabwe is ’n uitstekende voorbeeld hiervan.”

Die ander is misdaad. Hy het langer as twee jaar gelede ’n aanbod om finansiële en tegniese hulp vir die stryd teen misdaad aan mnr. Charles Nqakula, destyds minister van veiligheid en sekuriteit gemaak, maar wag steeds op ’n antwoord.

Zuma se ontmoeting met die FBI op sy Amerikaanse besoek gee Bost egter nuwe moed vir die stryd teen misdaad in Suid-Afrika.

Bost het op ’n vraag van me. Sheila Camerer, DA-LP, oor wat die deurslag vir sen. Barack Oba­ma in verlede week se presidentsverkiesing gegee het, gesê: “Drie dinge – tydsberekening, geluk en die vermoë om geld in te samel. As daardie drie faktore saamval, is die eerste plek jou beskore.”