“Liewe hemel, hoekom wil ek hierdie werk doen?” het sen. Barack Obama volgens The ­Guardian gesug ná ’n CIA-voorligtingsessie oor die soms vreesaanjaende lys van buite­land­se bedreigings waarmee hy as nuwe Amerikaanse president te make sal kry.

’n Senior Westerse diplomaat het gister saamgestem: “Ek wil daardie werk nie vir al die geld in die wêreld hê nie.”

Dit is die ergste ekonomiese krisis sedert die Groot Depressie, met nog geen teken dat dit die onderste draaipunt bereik het nie. Daar is chaos met die hulppakket. Die Amerikaanse minister van finansies sê elke dag iets anders. Werkloosheid neem toe. Die slegte nuus word al slegter. Daar is rekord-begrotingstekorte. Amerika bestee maandeliks $10 miljard in Irak.

“Dit is geld wat die land nie het nie. Dit is papiergeld,” het hy aan Die Burger verduidelik.

En aardverhitting is ’n werklikheid wat opofferings van Amerikaners gaan vereis. “Hul lewenstyl is onvolhoubaar, en nie een president was nog bereid om dit te sê nie, want dis te pynlik.”

Die ideaal is om binne 16 maande aan Irak te onttrek en heelwat van daardie meer as 120 000 soldate oor te plaas na Afganistan, waar die Taliban uitbrei.

Dit is nog ’n ope vraag hoe ­realisties hierdie Irakse onttrekkingsrooster is. Die Irakse regering word betrek by die besluitneming oor die tempo van onttrekking, wat onder meer bepaal word deur hoe gereed die Irakse veiligheidsmagte is om onafhanklik in ’n gebied voort te gaan.

Pakistan is ’n “onoplosbare” vraagstuk met ’n onverpoosde stroom selfmoordaanvalle deur ekstremiste.

In Israel-Palestina word steeds gestreef na ’n politieke skikking ten einde twee onafhanklike state naas mekaar tot stand te bring.

Obama het reeds gesê hy sal met Iran gesprek voer oor sy kernprogram. Hy het ook gesê Iran kan nie toegelaat word om ’n kernwapenarsenaal op te bou nie. Die toekomstige Oba­ma-administrasie wil met Sirië ook praat. Die Siriese minister van buitelandse sake, mnr. Walid Moealem, het onlangs gesê hy sal eerder nouer betrekkin­ge met Amerika wil sluit as met Iran.

Vergeleke hiermee lyk die Noord-Koreaanse kernvraagstuk tans na ’n kleiner uitdaging. Onderhandelinge hieroor met die Noord-Koreaanse ower­heid in Pjongjang het reeds ver gevorder.