Washington. - Sen. Barack Obama, Amerika se aangewese president, het ’n Demokraat en ’n Republikein aangewys om hom die naweek op die G20-wêreldberaad hier te verteenwoordig.

Me. Madeleine Albright, minister van buitelandse sake onder oudpres. Bill Clinton, en mnr. Jim Leach, ’n Republikeinse kongreslid, sal namens hom met wêreldleiers, insluitend van Suid-Afrika, gesprek­ke voer.

Pres. Kgalema Motlanthe en mnr. Trevor Manuel, minister van finansies, sal Suid-Afrika se afvaardiging na die beraad in Washington lei.

Obama het met hierdie stap gewys hy is ernstig daaroor om na die Republikeinse Party uit te reik. Hy oorweeg ook twee senior partylede, sen. Chuck Hagel en Richard Lugar, in sy kabinet.

Obama gaan nie self pres. ­George W. Bush se beraad oor die finansiële krisis bywoon nie omdat hy nie die huidige president se kollig wil steel nie.

Ontleders reken ook hy probeer veilig speel deur nie ’n standpunt in te neem oor kwessies wat hy nie by magte is om op te los nie. Hy wil ook beslis nie Bush se probleme op sy skouers laai nie.

Omdat baie van die wêreldleiers Obama graag wil ontmoet, het hy Albright en Leach aangewys om informele gesprekke te voer en insette van hulle te kry.

“Daar is een president op ’n slag in die Verenigde State, daarom het die aangewese president minister Albright en kongreslid Leach, ’n ervare en veelpartyspan, gevra om ons vriende en vennote om sy onthalwe te ontmoet en na hulle te luister,” het mnr. Denis McDonough, Obama se beleids­advi­seur, aan Reuters gesê.

Leach is ’n gematigde Republikein van Iowa wat Obama in die presidentswedloop gesteun het en op die Demokratiese nasionale konvensie in Denver gepraat het. Hy was ook voorsitter van die huis van verteenwoordigers se komitee vir ban­ke en finansiële dienste.

Die beraad is die eerste in ’n reeks wat Bush en pres. Nicolas Sarkozy van Frankryk aangevoor het om die hervorming van die wêreld se finansiële stelsel te bespreek om sodoen­de ’n krisis te verhoed soos die huidige een wat dreig om ’n wê­reld­wye resessie te veroorsaak.

Die G20 bestaan uit Argentinië, Australië, Brasilië, Brittanje, China, Duitsland, Frank­ryk, Indië, Indonesië, Italië, Japan, Kanada, Mexiko, Rusland, Saoedi-Arabië, Spanje, Suid-Afrika, Suid-Korea, Turkye en die VSA.