Die Burger | Nuus | Polisie slaan toe op handelsmisdaad en trek verskeie vas

George. - Vermeende misdadigers in die Suid-Kaap het hul rieme styfgeloop in twee afsonderlike voorvalle wat met handelsmisdaad verband hou.

Die polisie het Sondag tydens ’n roetine-padblokkade in Beaufort-Wes ’n groot deurbraak gemaak toe hulle beslag gelê het op sigarette van R3,6 miljoen wat vermoedelik vir die sluikhandel bestem was. Vyf verdagtes is aangekeer en hulle verskyn vandag in die hof.

Kapt. Malcolm Pojie, Suid-Kaapse polisiewoordvoerder, het gister gesê die verdagtes was vermoedelik van Botswana na Kaapstad onderweg toe hulle aangekeer is. Beslag is gelê op 81 kartondose vol sigarette en kontant van R70 000.

Die polisie hier het ook besonderhede bekend gemaak van ’n vermeende kredietkaartbedrogsindikaat in die Suid-Kaap.

Was dit nie vir die oplettendheid van lede van die publiek nie, was die vermeende misdadigers waarskynlik nou nog op vrye voet.

Speurinsp. Trevor Engel het gesê die polisie het op 16 Julie inligting van mense in Mosselbaai ontvang dat vyf verdagtes by ’n vakansieoord daar tuisgaan.

Die mense het onraad vermoed toe hulle van motors verwissel het. Die polisie het ondersoek ingestel en die groep dopgehou.

Daar is vasgestel dat hulle met vervalste paspoorte die motors by motorverhuringsmaatskappye gehuur het.

Hulle het ook met verskillende kredietkaarte goedere by winkels in die Langeberg Mall gekoop.

Twee van die verdagtes het die vakansieoord op 18 Julie verlaat. Die polisie het hulle na Knysna agtervolg. By die Knysna Mall het hulle vervalste kredietkaarte gebruik en onderskeidelik R30 000 en R15 000 kontant onttrek.

Van Knysna is hulle na die George-lughawe, waar hulle vliegtuigkaartjies na Johannesburg probeer koop het.

Die polisie het hulle daar aangekeer en na Mosselbaai geneem, waar minstens tien vermoedelik vervalste kredietkaarte in ’n tas gevind is. Al die kredietkaartnommers behoort aan buitelanders.

Engel het gesê hy vermoed dat die verdagtes kontakte in die immigrasie-afdeling van die departement van binnelandse sake het.

Die ondersoek duur voort en in dié stadium is die polisie nie bereid om ’n bedrag te koppel aan die beweerde bedrog nie. Daar is wel vasgestel dat een van die kredietkaarte ’n limiet van $250 000 (sowat R1,96 miljoen) het.

Die verdagtes sal op 17 Augustus in die hof in Mosselbaai verskyn.


	Kontak ons \| Navrae \| Teken in op ons nuusbrief \| Vrae oor registrasie \| Adverteer \| gebruikersooreenkoms \|