Los Angeles. – Sowat 1,6 miljoen Michae­l Jackson-ondersteuners het die afgelope paar dae alles in hul vermoë gedoen om gratis kaartjies na die popkoning se gedenkdiens in Amerika te wen.

Die diens sal môreoggend om 10:00 (ongeveer 17:00 Suid-Afrikaanse tyd) by die Staples-sentrum in Los Angeles gehou word. Uit dié 1,6 miljoen aansoeke sal net 17 500 kaartjies weggegee word, berig E! Online. Hiervan sal net 11 000 wenners in die Staples-sentrum toegelaat word, terwyl die res in die nabygeleë Nokia-teater op ’n groot skerm na die diens sal kyk.

’n Webtuiste om die kontrolering van die intekenare te behartig, staplescenter.com, het Vrydag binne twee uur ongeveer ’n halfmiljard besoeke gekry. Die kompetisie het Saterdag gesluit en die wenners is gister bekend gemaak.

Volgens CNN is Jennifer Hud­son een van die bekendes wat die diens sal bywoon. Terwyl min besonderhede oor die diens bekend gemaak is, word bespiegel dat kunstenaars ter nagedagtenis aan Jackson sal optree.

Die Jackson-gesin het nie besonderhede bekend gemaak oor waar hy ter ruste gelê gaan word nie. Sy ouer broer, Jermaine, wil hê dat hy op die Neverland-landgoed begrawe moet word, het Sapa berig. – Saamgestel deur Jana Breytenbach