Die instelling van nuwe wetgewing ingevolge waarvan alle mense wat ’n selfoon besit daardie foon se simkaart persoonlik moet laat registreer, vorder flink.

Me. Dot Field, woordvoerder van Vodacom, die land se grootste selfoondienstegroep, het gesê hulle vorder fluks met die instelling van die nuwe regulasies.

Dié wetgewing vereis dat alle selfoonintekenare ingevolge die Wet op die Onderskepping van Inligting en Voorsiening van Kommunikasieverwante Inligting (Rica) ’n bewys van identiteit en woonadres aan agente wys wanneer hulle ’n simkaart koop.

Die bepaling geld alle simkaarte in gebruik. Rekeninghouers hoef egter net die inligting te bevestig, aangesien dit reeds verskaf is.

Vanaf 1 Julie het mense 18 maande kans om te registreer, waarna ongeregistreerde simkaarte gedeaktiveer sal word.

Volgens Field is spesiale meganismes in werking gestel om die proses so vaartbelyn as moontlik te maak. Mobiele agente om bejaardes en siekes te besoek is ’n moontlikheid.

Ouers of voogde van kinders jonger as sestien sal die verantwoordelikheid dra om die betrokke simkaarte te registreer.

“Vodacom het 20 000 werkers gewerf wat ons landwyd, maar veral in informele nedersettings, ontplooi,” het sy gister aan Die Burger gesê.

Vodacom het sowat 23 miljoen voorafbetalende kliënte teenoor vier miljoen rekeninghouers.

Field meen die nuwe wetgewing sal help om misdaad te bekamp.

Vodacom-kliënte kan by enige Vodacom-afsetpunt registreer of die kliëntediensnommer 0 111 skakel vir die naaste Rica-agent.

MTN-intekenare kan by alle MTN-dienssentra registreer of 0 173 skakel.

Cell C-kliënte kan by Cell C-konsessiewinkels, of waar ook al hulle Rica-bordjies sien, registreer of 0 140 skakel.

Volgens Field moet mense wat hul simkaarte wil registreer die volgende verskaf:

 Selnommer;

 Volle naam en van;

 ID- of paspoortnommer (’n ID-boekie, ’n ID-kaart, ’n tydelike ID-sertifikaat of ’n paspoort); en

 Bewys van fisieke adres (enige dokument met die registreerder se naam en woonadres op, byvoorbeeld ’n bankstaat).