Nelspruit. – ’n Lid van ’n roofbende wat Vrydagmiddag besoekers aan die Innibos-fees in Nelspruit aangeval het, is deur een van die slagoffers doodgeskiet.

Mev. Leona van Lingen en haar man, Willie, het skaars ’n uur voor die aanval van Gauteng in Nelspruit aangekom.

“As ons nie ’n vuurwapen by ons gehad het nie, sou ons waarskynlik baie erger daarvan afgekom het,” het mnr. Van Lingen gesê.

Volgens die polisie in Nelspruit het die Van Lingen-egpaar, mev. Betsie Zwart en ’n vierde vrou, ene me. Van Wyk, hul voertuig kort ná hul aankoms in die feesterrein geparkeer.

Hulle was in Piet Retiefstraat te voet op pad na ’n vertoning toe hulle deur vier aanvallers gekonfronteer is.

“Een het Betsie se handsak gegryp,” het mnr. Van Lingen vertel. “Sy het terugbaklei. Een van die aanvallers het ’n mes uitgepluk en probeer om haar daarmee te steek.”

Mev. Van Lingen het blykbaar in ’n stadium haar rewolwer uitgehaal. ’n Skoot het afgegaan en die vermeende rower is in die bors getref.

Hy is op slag dood. Die ander drie verdagtes het gevlug. Die polisie ondersoek die voorval. – Buks Viljoen