Pretoria. - Die Gereformeerde Kerke in Suid-Afrika (GKSA) se verbod op vroue as predikante en ouderlinge is “net nog ’n spyker in die sterwende GKSA (se doodskis)”.

Dié mening van ’n student wat met ’n doktorale studie oor krimpende kerke besig is, is maar een van talle van ongelukkige lidmate van die GKSA nadat die kerk se algemene sinode eergister besluit het om vroue uit dié ampte te hou.

Die student, onder die skuilnaam VVV, skryf op Neels Jackson se blog by www.beeld.com: “My hartseer is groot oor hierdie pynlike stadige selfmoord.”

Onder die ander reaksies was daar ook ’n oproep van prof. Susan Coetzee-Van Rooy om ’n kerklike boikot.

Nie almal was egter negatief nie. Me. Maureen van Helden, wat self teologie gestudeer het, skryf op die blog as “Doppervrou (juigend)” as dit God se wil is dat vroue in die ampte moet staan, sal dit gebeur as sy tyd reg is daarvoor.

By navraag het sy gesê sy is nou heeltyds betrokke in die kerk se jeugkantoor. Al kan sy nie preek nie, voel dit nie vir haar asof alle deure nou vir haar toegegaan het nie. Sy hoef nie op ’n preekstoel te staan om God te dien nie.

Hierop het ’n ander blogger onder die naam “Hettie Dopper nie juigend” geskryf: “Hoe verskriklik hartseer! Lieg ek dan vir myself as vrou as ek die roeping om as prediker op te tree in my hart voel? Speel God ’n nare speletjie met my deur my die gawe te gee en dit dan te verbied in Sy kerk?”

Me. Annalie Steenkamp-Nel, wat 15 jaar gelede haar teologiese studie voltooi het, het by navraag gesê sy is minder bekommerd oor dié besluit as oor die feit dat kerke al meer irrelevant raak. Dié besluit dra egter daartoe by.

Steenkamp-Nel, wat intussen ’n bediening buite die kerklike strukture opgebou het, het gesê dis ’n baie blootgestelde posisie, maar dit gee haar ook ’n klomp vryheid. Sy dink sy is nou beter in kontak met die samelewing as wat sy as dominee sou wees.

‘EK IS JAMMER’

“Ek voel verslae. Ek moes my vrou en dogters in die oë kyk en sê dat ons manne op die sinode weer besluit het dat hulle nie regtig volwaardige lidmate van die Gereformeerde Kerke is nie.”

Só het dr. Riaan Rheeder, predikant van die Gereformeerde Kerke (GKSA) in Suid-Afrika se Randfontein-gemeente gister aan Beeld, susterkoerant van Die Burger, se brieweblad geskryf na aanleiding van die GKSA se besluit om nie vroue as predikante of ouderlinge toe te laat nie.

“Dit is vir my baie seer. Ek voel so woordeloos. En ek is so lief vir my kerk. Dit voel of ek hulle (en alle vroue) só in die steek gelaat het. Al wat ek julle vanoggend kan bied, is my diepste hartseer en verskoning.”