Kaapstad. - Wes-Kaapse staatsdokters ontken dat enige babas weens hul huidige staking gesterf het.

Die Anglikaanse aartsbiskop van Kaapstad, aartsbiskop Thabo Makgoba, het gister gevra hoeveel babas al weens die stakende staatsdokters se staking oor hul besoldiging gesterf het.

Intussen het die regering en die komitee van mediese dekane die stakende staatsdokters aangeraai om weer te begin werk.

In ’n veroordeling van die dokters se staking, wat ook Wes-Kaapse staatshospitale sedert Dinsdag verlam het, het Makgoba gesê dit sal tot sterftes lei.

“Dié met die nodige middele kan na private dokters gaan, maar die armes moet sonder sorg klaarkom en sommige sal sterf.” In ’n verklaring het hy die departement van gesondheid gevra of die staking daartoe gelei het dat meer babas as gewoonlik gesterf het.

Die Rooi Kruis-kinderhospitaal se prof. Heather Zar, hoof van pediatrie en kindergesondheid by die Universiteit van Kaapstad, het gesê kindersorg by dié hospitaal het onverpoos voortgegaan ondanks protesaksie oor die middaguur deur dokters daar.

“In die geval van my hospitaal, maar ten minste in die Wes-Kaap, dink ek beslis nie enige babas het weens die staking gesterf nie, want toegang tot noodsorg is nog wyd beskikbaar,” het Zar gesê.

Mnr. Themba Maseko, regeringswoordvoerder , het gister op ’n nuuskonferensie ’n beroep op staatsdokters gedoen om “onmiddellik” terug te keer na hul poste, berig Sapa. Indien hulle versuim om terug te keer, sal wegblyers se poste geadverteer word nadat die spertyd van 21 dae ná vandeesweek se besoldigingsaanbod aan dokters verstryk het. Ook die komitee van mediese dekane het verdere protesaksie afgeraai.

Die Wes-Kaapse minister van gesondheid, mnr. Theuns Botha, het intussen aangedui die beleid van geen-werk-geen-betaling waaraan dokters onderwerp is, is na sy mening “voldoende straf”.

Me. Hélène Rossouw, woordvoerder van die Wes-Kaapse gesondheidsdepartement, het by navraag gesê die aflegging van dokters, soos in KwaZulu-Natal, word nie in die Wes-Kaap oorweeg nie.

In reaksie op Makgoba se vraag oor babasterftes het Rossouw gesê die departement is nie bewus van enige gevalle van lewensverlies weens die staking in die Wes-Kaap nie.