Los Angeles. – ’n Sterk narkotiese middel, Propofol, en nie die pynstiller Demerol nie het dalk aanleiding gegee tot die hartversaking wat die lewe van die superster Michael Jackson verlede week geëis het.

Volgens die webtuiste tmz.com (TMZ) het Jackson dalk Propofol in sy gestel gekry voordat hy gesterf het. Talle mediese kenners het aan TMZ gesê daar is geen mediese rede vir Jackson om Propofol in sy huis te hê nie. Dit word binne-aars toegedien en gebruik om mense hul bewussyn te laat verloor voor chirurgie.

Volgens TMZ het Jackson gereeld Propofol gebruik om te slaap en was hy verslaaf aan die uitwerking van narkose.

Daar word ook berig die Amerikaanse federale agentskap teen dwelms (DEA) sal die Los Angeles-polisie bystaan om al die dokters wat dwelms aan Jackson verskaf het aan die kaak te stel. Jackson het glo skuilname soos Omar Arnold en Jack London gebruik om medikasie in die hande te kry.

Volgens ingeligtes was die misbruik so blatant dat ’n sekere dokter net ’n apteek sou bel en sê Jackson is op pad vir Demerol.

Die apteek sou dan die voorskrif uitreik, maar die pasiënt se naam nie invul nie.