Londen. - Die rede? Murray staan ’n kans om die eerste Brit sedert 1938 te word om die Wimbledonse tennistoernooi te wen.

En as hy vandag met Roddick klaarspeel, sal Sondag se eindstrydkaartjies selfs meer gesog wees. Só optimisties is die Britte oor hul beste titelhoop sedert Tim Henman dat kaartjies vir Sondag se wedstryd Woensdag teen £20 000 (sowat R257 000) op die internet te koop aangebied is.

Met elke Murray-sege die afgelope twee weke het dit duurder geword om hom in aksie te sien. Toe hy Juan Carlos Ferrero Dinsdag geklop het, is ’n kaartjie wat normaalweg £170 (R2 200) kos vir £6 100 (R78 500) aangebied en aanhangers was bereid om tot 48 uur tou te staan vir ’n kaartjie.

Nie almal het Murray egter al vergewe vir sy buierigheid in vorige Wimbledon-toernooie nie.

Enkele joernaliste meen Britte moet hulle vir nog ’n teleurstelling gereed maak. “Het vandeesweek se hittegolf die hele land gelyktydig laat sonsteek kry, of hoekom dink Brittanje ’n plaaslike speler gaan vanjaar wen?” wou die rubriekskrywer Nick Bruzon in die London Paper weet.

“Ek is nie gekant teen ’n Britse wenner nie, maar dit krap net dat hierdie suur jong man – 22 jaar oud, maar eintlik 50 – ons enigste hoop is.”

Bruzon het onderneem om nie net sy woorde nie, maar sy hoed te eet as Murray hom verkeerd bewys. Murray het op sy beurt aangedui hy steur hom min aan menings in die media.

Roger Federer en Tommy Haas pak mekaar vandag in die eerste halfeindstryd.