Forelle is aan die loop en sommer goed ook. Dit het gister gelyk of die hoofrede hiervoor die skielike warm weer is wat talle soorte insekte laat “ontdooi” het en oor die stil damme en sytakke van bergstroompies baljaar.

Medewerkers van Katonkel wat deur die week in die Du Toitskloof was, verwag die naweek ’n toeloop van die “kniebroek-brigade”, maar ook in die plaasdamme is daar skielik lewe.

Mooi groot forelle is aangekeer, hoofsaaklik op vliegies, terwyl die wurmpies en platannas stil in die water bly lê het.

Op Eikendal, buite Stellenbosch, het Philip Meyer (021 855 2646) van die bekende vlieghengelskool Fly Talk aan Katonkel gesê op die plaas is ook sterk byte gesien.

Wat veral opsigtelik is, is die aantal jongmense wat deesdae in vlieghengel belangstel. Dit is ’n tendens wat danksy die opleidingsentrums ontwikkel het, vertel Johan du Prez van Seepunt.

Meyer het gister vertel dat dit nie meer soos in die ou dae is dat vlieghengel ook net tot forelhengel beperk is nie.

Die kuns om vliegies, wat soos die ware Jakob lyk, self te maak, het so goed gevorder dat enige vis wat op sy oë staatmaak om kos te vang, met ’n kunsvlieg gevang kan word.”

Du Prez reken vlieghengel is soos baarshengel aan die toeneem omdat al hoe meer mense (veral ook vroue) die voorbereiding tot ’n kunsvlieguitstappie net so opwindend vind as die uitstappie self. Dis lankal nie meer ’n kwessie van aas aansit en sit en wag nie, glo die meisies. En boonop is dit ’n gebied waar hulle op gelyke voet met manlief kan kompeteer.

In sommige Europese lande is vlieghengel reeds amptelik ’n skolesport en by enkele skole in Italië skoolvakke, met nogal ingewikkelde handboeke.

Die oplewing in die riviere, ten spyte van die gure weer, word egter tans maar traag benader deur die baarsmanne wat vir die volgende weke tot ruste gekom het omdat baarse nou nesgeskop het.

Die kleintjies sal binnekort beskerm moet word en dan is ma en pa nie lus vir vliegies jag nie.

In ’n opname wat ons die afgelope week gemaak het, blyk dit nou dat vlieghengel weer eens minstens twee kabeljoue vanaf ’n skuit in die Breederivier opgelewer het.

Al hoe meer mense het die laaste tyd ook Hermanus se hawemuur vir die nuwe “dropshot”-tegniek gebruik en met kolstert en das vorendag gekom.

Met gewone stok en katrol vanaf die sand het galjoene nie op hulle laat wag nie. Visse van 2 kg is by die Plaat, by Hermanus, gevang.

Hermanus se hoë walle aan die sirkelpad het ook kolstert opgelewer.

Op Strandfontein se sand is nog twee albaster-rogvisse aangekeer. Een het die skaal op 37 kg getrek. Albei die visse is vrygelaat.