Tonge is los in die surfgemeenskap oor die Mr Price Pro, wat vanjaar van Durban na Ballito aan die KwaZulu-Natalse Noordkus verskuif.

Dié byeenkoms het afgesit met stewige sesvoet-branders wat stadig maar seker ál groter geword en kort voor lank by die 10 voet getrek het.

Dít het die organiseerders genoop om die kompetisie te neem na ’n plek wat die groot branders kon hanteer. Net een probleem – die gekose plek is ’n secret spot en een van die bes bewaarde geheime aan die Noordkus.

Met ’n swetterjoel surfers, fotograwe, videokameras en dies meer by die Mr Price, is daar van geheime Noordkus-juwele g’n meer sprake nie.

Glo my vry, die plaaslike surfers is briesend oor dié verwikkelinge.

Maar nou ja, dit was seker net ’n kwessie van tyd voor die geheim uitgelap sou word en die besluit om die kompetisie na die Noordkus te neem, kan seker nie gekritiseer word as die gehalte van die branders in ag geneem word nie.

Tot dusver het groot barrels en skouspelagtige wipe-outs die kompetisie een van die bestes in jare in die WQS-reeks gemaak.

Dieselfde kan nie gesê word van die Hang Loose Pro, een van die byeenkomste in die prestigeryke WCT-reeks, wat tans in Brasilië gehou word nie.

Die Hang Loose word deur ’n gebrek aan branders van gehalte gekenmerk en die wêreld se top-surfers moes drie dae lank ledig rondsit voordat die aksie gister hervat is.

Jordy Smith en Greg Emslie is in die derde ronde uitgeskakel, terwyl Davey Weare reeds ná die tweede ronde sy tasse moes pak.

Alle oë sal egter binnekort gerig wees op Suid-Afrika se surfmekka, Jeffreysbaai, wanneer die Billabong Pro daar beslis word.

As ’n aptytwekker vir die hoofmaal het die plaaslike man Ryan Payne verlede week in epiese toestande die Xcel Supertubes Showdown gewen.

Dít verleen aan hom toegang tot die Von Zipper Trials, wat ’n uitdunronde is vir deelname aan die hoofbyeenkoms.

Hoewel Payne die groot slag in die eindstryd teen Warren Dean geslaan het met ’n volmaakte barrel-rit, het die jongelinge Dylan Lightfoot en Steven Sawyer ook stem dik gemaak. Onthou maar gerus daai name.

Die Xcel is die eerste keer aangebied en 16 plaaslike surfers is na J-Bay genooi. Vir dié wat nie weet nie, Xcel vervaardig wet­suits en sy produkte is die afgelope twee jaar deur die Surfvervaardigersvereniging (SIMA) gekroon as die beste in die bedryf.

Dis darem nie net in Ballito en J-Bay waar goeie branders hul verskyning maak nie.

Hier in ons eie agterplaas lyk dit of daar môre sommer baie aksie gaan wees.

’n Swell van vier tot ses voet word verwag aan die Atlantiese kant van die skiereiland, met ligte ooste- tot noordoostewinde wat toestande mooitjies gaan afrond. Jy kan dus kies en keur waar jy wil gaan surf.

Teen Sondag begin ons die eerste tekens van die volgende frontale stelsel sien, met die wind wat noordwes draai.

Die branders sal kleiner wees, maar daar’s ’n paar plekke (soos die Witsand-gebied en ’n paar ander spots aan die Weskus en in die Overberg) wat skaflike branders sal lewer.