Die DA-leier, me. Helen Zille, het aangedring dat die SAUK haar toelaat om Afrikaans te praat tydens die onderhoud net nadat sy gestem het.

Sy was een van die min politieke leiers wat nie ingedruk het in die ry nie, maar haar kans geduldig saam met mede-kiesers afgewag het. Daar was ook geen lyfwag in sig nie.

Zille het haar kruisie getrek by die St. Paul’s-kerk in Hoofweg, Rondebosch, waar sy vergesel is van haar man, prof. Johann Maree, en hul seuns, Thomas en Paul.

“Dit was ons eerste familie-uitstappie in ’n lang tyd, en dit was baie lekker,” het Zille, wat die afgelope 82 dae bykans nooit tuis was nie, gesê.

Sy het ’n helde-ontvangs gehad by die stempunt, wat in die middel van die Kaapse suidelike voorstede geleë is - ’n bakermat vir die DA.

Mense het gejuig toe sy aankom, en haar voortdurend sterkte toegewens en drukkies gegee, terwyl studente van die nabygeleë Universiteit van Kaapstad se DA-tak haar toegesing het.

Prof. Maree het gesê dis ’n pure plesier om vir jou vrou te kan stem in ’n verkiesing.

“Dis ’n voorreg om my vertroue in haar op ’n verdere wyse te toon,” het hy gesê.

Hy en die twee seuns was beslis van plan om voordeel te trek uit ’n kitskos-restaurant se aanbod van gratis koffie as jy kan aantoon jy het gestem.

Zille het alle opposisiekiesers gevra om te stem teen ’n tweederde-meerderheid, en haar opponent van die ANC, mnr. Jacob Zuma, as ’n “eenman-grondwet-vernietiger” beskryf.

Zille was vol vertroue dat die DA die meeste stemme in die Wes-Kaap sou trek, om dit as ’n opposisie-alternatief tot die ANC in regering te stel.

Sy hoop vir ’n volstrekte meerderheid in die provinsie, maar andersins sal die DA met ander partye onderhandel om ’n koalisie-regering te vorm.

Zille het vanuit Rondebosch vertrek om stempunte in die Kaapse Skiereiland en Johannesburg te besoek, vanwaar sy haar by die nasionale uitslaesentrum in Pretoria sou tuismaak.