Kaapstad. - Die gewildheid van die aansteeklike treffer “Koekie Koeke Loekie” wat in die afgelope verkiesingsveldtog deur politieke partye gebruik is, het al die kun­stenaar se verwagtinge oortref.

Abby James (34) van Eersterivier, wat dié lied die laaste twee jaar sing, het eers ’n maand of twee gelede begin agterkom dat politieke partye dié lied ingespan het as deel van hul veldtogte.

Dit was veral me. Helen Zille, DA-leier en burgemeester van Kaapstad, wat ondersteuners by saamtrekke vermaak het met haar weergawe daarvan.

James het Sondag self die liedjie by die OD se finale verkiesingsaamtrek in Delft gesing.

Dié ma van twee, wat haar sangloopbaan “op Shoprite se stoep” begin het, se eerste treffer was “Outjie met jou lekker boudjie”. Sy sing al die afgelope tien jaar en het ’n CD saam met die groep A2Zee uitgereik.

Ná haar sangmaat twee jaar gelede besluit het om ’n blaaskans te neem, het sy “Koekie Koeke Loekie”, wat deur haar vriend mnr. Godfrey Conradie geskryf is, opgeneem.

“Ek het so twee maande gelede by mense gehoor die song word in verkiesingsveldtogte gebruik. Dit is egter nie die oorspronklike weergawe wat in dié veldtogte gebruik word nie.

“Ek het nietemin gevlei gevoel omdat dit baie goeie bemarking is vir my.

“Ek was verbaas dat hulle die song gebruik het. Dit was baie oorweldigend. Ek het nooit gedink dit sou so gewild raak nie.”

Sy is geen politieke dier nie, maar gaan beslis vandag stembus toe. Sy wou nie verklap langs watter party sy haar kruisie gaan trek nie.

Volgens James werk sy aan nog ’n CD, maar sy is tans druk besig om voor te berei vir haar toer wat op 1 Mei in Clanwilliam begin.

Die probleme in haar gemeenskap lê James baie na aan die hart.

“Daar is so min rolmodelle in ons gemeenskappe en baie kunstenaars wil naam maak oorsee. Ek wil egter hier bly en vir ons kinders wys dat jy die hoogste sport kan bereik as jy wil.”