Kaapstad. - Die grootste bywoningsyfer vir ’n sokkerwedstryd tot nog toe in die Moederstad gaan môre oortref word, wanneer die gewildste span ter wêreld en die gewildste span in Suid-Afrika slaags raak.

Die Engelse Premierliga- en Kampioeneliga-wenner, Manchester United, pak die Soweto-spogspan Kaizer Chiefs in die eerste wedstryd van die Vodacom-uitdaagtoernooi vandag om 15:30 op Nuweland.

Mnr. Brad Jansen, hooforganiseerder van dié toernooi, het gister aan Die Burger gesê teen gisteraand was 90% van die kaartjies vir dié wedstryd uitverkoop. Nuweland kan sowat 49 000 toeskouers huisves.

“Daar was omtrent nog 2 000 kaartjies teen 15:00 (gistermiddag) beskikbaar. Ons verwag dat die kaartjies voor die afskop opgeraap gaan word,” het hy gesê.

Volgens Jansen was dié twee spanne ook by die vorige rekord betrokke. Nuweland was in 2006 sowat 76% vol vir dié kragmeting.

Gewoonlik as Chiefs in die Moederstad teen die Kaapse Premierliga-spanne, Ajax Cape Town en Santos, speel, voel hulle soos die tuisspan. Hul ondersteuners ruk gewoonlik in groot getalle by die Athlone-stadion op en wys wie is baas.

Vandag sal dié span se doppie egter op die paviljoene geklink word, met die United-mal Kapenaars wat vandag die kans kry om hul helde in lewende lywe te aanskou.

Hoewel die omstrede Cristiano Ronaldo nie saam met die Rooi Duiwels kom safari hou nie, is daar nog steeds verskeie sterre in die span se geledere.

Ronaldo het vir Portugal in die onlangse Euro2008-toernooi gespeel. Hy het ook ’n enkeloperasie ondergaan en sal eers in Oktober vir United beskikbaar wees.

Die sterre wat nie in die Europese toernooi gespeel het nie, sal egter die volk oor die volgende week met hul ongelooflike talente betower.

Wayne Rooney, Ryan Giggs, Rio Ferdinand en Carlos Tevez gaan almal van vandag gesien word. Ná vandag se wedstryd reis United na Durban, waar hy die ander Soweto-spogspan, Orlando Pirates, Dinsdag pak.

Woensdag speel Chiefs en Pirates in ’n derby-wedstryd in die OPRU-stadion in Port Elizabeth.

Die wenner van dié wedstryd sal aanstaande Saterdag teen United in die eindstryd op Loftus Versfeld in Pretoria speel.