Terwyl die Kaap sy winterkombers gewas en dit oor die naweek goed uitgeskud het, het die Boland en die Overberg nog nie té erg onder die reënweer deurgeloop nie.

Mnr. Reinard Geldenhuys, hoof van die brandweer en rampbestuur vir die Overberg-distriksmunisipaliteit, het gesê die gebied het Saterdag oornag goed reën gehad, maar niks ernstigs is aangemeld nie. Die redding-, swem-, en duikspanne is egter op ’n gereedheidsgrondslag.

“Alles is gereed vir vloedwater-redding, veral omdat mense in die verlede, veral in riviere, in die moeilikheid geraak het.”

’n Beampte by die Helderbergse brand-en-redding het gesê hulle het nog nie enige klagte oor oorstromingsprobleme ontvang nie.

’n Onderneming in Somerset-Wes se hoofstraat het egter Saterdag deurgeloop toe afvoerpype verstop geraak het en die reënwater nie behoorlik weggevoer kon word nie.

Mnr. Kris Fleming, KFC se Helderberg-streekbestuurder, het gesê die afvoerpype in die straat het Saterdag verstop geraak. Dit het veroorsaak dat die water in die straat styg en die winkel oorstroom het. “Ons moes kratte in die winkel plaas vir ons klante om op te staan. Ons werknemers het die winkels opgeruim nadat die munisipaliteit die afvoerpype oopgemaak het.”

Inwoners van Kylemore het in ’n stadium gevrees dat die toegang tot die buurt moontlik deur vloedwater afgesny sou word.

Mnr. Zane Malan, peloton-offisier van die Stellenbosch-brandweer, het gesê: “Die Kylemorerivier se oewer was besig om oorstroom te word en ook die brug was in gevaar. Dit is Kylemore se enigste toegangsroete. Ons was bekommerd dat die vloedwater sou voorkom dat die inwoners nie in of uit die buurt sou kon beweeg nie.”

Malan het gesê hulle het die oewer met sandsakke versterk. “Dit is tans veilig.”

In Stellenbosch het die brandweer ’n oproep gekry dat ’n huis in Eikestraat, Cloetesville, oorstroom word. Reënwater het teen ’n heuwel afgestroom en deur die huis gespoel. “Ons het sandsakke binne en buite die huis gepak, en die water gekanaliseer sodat dit verby die huis kan vloei,” het Malan gesê.