KAAPSTAD. – ’n Reuse-hofsaak tussen die regering en die maatskappy wat die V & A Waterfront gekoop het, kan hom binnekort afspeel indien beoogde wetgewing oor die bestuur van kusgebiede goedgekeur sou word.

Dié wetgewing, wat tans voor die nasionale parlement dien, sal verhoed dat Transnet sy kontraktuele verpligtinge teenoor Lexshell – die koper van die Waterfront, waarvan Dubai World, London & Regional en ’n SEB-konsortium deel vorm – kan nakom.

Transnet het gister op ’n vergadering met die staande komitee oor maatskaplike ontwikkeling in die Wes-Kaapse wetgewer uitsluitsel gegee oor die grense, voorwaardes en ooreenkomste wat met die verkoop van die Waterfront in Oktober 2006 verband gehou het.

Die besonderhede van die verkoopkontrak was tot gister toe duister omdat Transnet dit aanvanklik nie rugbaar wou maak nie.

Transnet was gedurende die vergadering steeds onwillig om daaroor uit te wei, maar het vanweë druk van die lede van die staande komitee uiteindelik ingewillig om die koopkontrak aan die komitee te oorhandig.

Mnr. John Dludlu, nasionale woordvoerder van Transnet, het daarna ook ’n persverklaring uitgereik waarin antwoorde verskaf is oor die redes vir Transnet se voorgestelde wysigings aan die Wetsontwerp op die Beheer van Kusgebiede, asook die verbintenisse wat Transnet aangegaan het in verband met die drooglegging van seegebiede.

Ingevolge ’n ooreenkoms wat Transnet in 2001 met die Waterfront aangegaan het voordat dit aan die Lexshell-groep verkoop is, is onderneem om toe te sien dat die seegebied wat onmiddellik aan die Waterfront grens, drooggelê word. Dit sluit glo toekomstige ontwikkelings in wat ’n oppervlak van 270 000 m² beslaan.

Die ooreenkoms behels dat Transnet (omdat hy vroeër jare die eienaar van groot gedeeltes van seegebiede en hawens aan die Suid-Afrikaanse kus bekom het), die nodige regeringsgoedkeuring vir drooglegging sou verkry, waarna die grond aan die Waterfront teruggegee sou word.

Indien die Wetsontwerp op die Beheer van Kusgebiede egter in die toekoms goedgekeur sou word, sal dit beteken dat Transnet nie ál die voorgenome droogleggings kan nakom nie.

Die regsverteenwoordiger van Lexshell, mnr. Hendrik Kotzé van die regsfirma Jan S. de Villiers, wat ook gister die vergadering bygewoon het, het gesê dít sal “baie ernstige ekonomiese implikasies” hê.

“Ons het grondige kontraktuele regte en ons verwag dat die nasionale parlement dit sal eerbiedig,” het hy gesê.

Die Burger het vroeër berig dat die kus- en seegebiede in Transnet se besit die gedeelte van die Groenpunt-vuurtoring tot by Robbeneiland, van daar tot by Melkbosstrand, asook die drooggelegde grond tot by die Kasteel insluit.

Transnet het egter ontken dat hulle al dié gebiede wil drooglê.

Volgens Dludlu is die gedeeltes in Transnet se besit, wat vir drooglegging geoormerk is, beperk tot gedeeltes onmiddellik langs die Waterfront wat Grangerbaai en die Breakwater-residensiële gebied insluit.

Transnet kon egter nie duidelikheid verskaf oor wat die 270 000 m²-ontwikkeling sal behels nie.

Transnet het onderneem om eersdaags nader inligting te verskaf oor die provinsiale regeringsamptenare wat by die fasilitering van die transaksie betrokke was, asook die 270 000 m²-ontwikkelings wat verder beoog word.