Kaapstad. - Hou links, gaan regs verby.

Dít is blykbaar nie net ’n padreël nie, maar geld ook vir die omstrede Protea-embleem op die sportdrag van Suid-Afrika se na­sionale spanne.

Te midde van die herrie oor die jag en slagting van die Springbok-embleem het dit aan die lig gekom dat dit nié net die nasionale rugbyspan is wat nie die Protea op die hart dra nie, maar ook Bafana Bafana, die nasionale sokkerspan.

Mnr. Morio Sanyane, woordvoerder van die Suid-Afrikaanse Sokkervereniging (Safa), het gister bevestig dat die Protea op die regterkant van die sokkertrui is en nié aan die linkerkant soos die Regulasies vir Nasionale Sportkleure van 2001 vereis nie.

“Ons het nog geen opdrag ontvang om die Protea te skuif nie.”

Jaco van der Merwe berig dat Bafana Bafana glo ’n geldige verskoning vir die posisie van die embleme op die nasionale sokkertrui het.

Volgens mnr. Raymond Hack, Suid-Afrika se sokkerbaas, kry die span eers volgende jaar sy nuwe toerusting van die klereverskaffers.

“Omdat die ontwerp van die truie in siklusse van vier jaar werk, kry Bafana eers volgende jaar nuwe truie,” het Hack gesê.

“Ons het dit (dat die embleem op die verkeerde kant is) reeds ’n lang tyd gelede onder die minister (mnr. Makhenkesi Stofile) se aandag gebring. Daar is geen druk van sy kant dat dit so gou moontlik aangepas moet word nie. Ons speel eintlik al drie jaar lank met hierdie ontwerp.”

Hierteenoor het me. Hajera Kajee, voorsitter van die nasionale kleurekomitee en visepresident van die Suid-Afrikaanse Sportkonfederasie en Olimpiese Komitee (Saskok), gesê hulle is onbewus van Bafana Bafana se sportdrag wat nie met die regulasies strook nie, maar sal dit opvolg.

Die regulasies is in 2001 saamgestel – langer as die siklus van vier jaar waarin Bafana se truie aangepas en vervaardig kan word.

Kajee het benadruk dat die regulasies duidelik uitstippel dat die Protea “op die hart” moet wees.