Stellenbosch. - Net ’n week nadat ’n pionier-sakeman van Paarl-Oos in sy huis in Klein-Drakensteinweg beroof is, het sy oudste seun gisteroggend op sy lyk in sy slaapkamer afgekom.

Die hande en voete van mnr. Fred Abrahams (78) – onder nabye vriende ook bekend as Aka – was met dasse vasgebind en nog ’n das was om sy nek gedraai.

Mnr. Adré Abrahams, wat sy pa getrou soggens besoek het, het die skokontdekking om 07:50 gemaak. Sy pa se lyk het op sy bed gelê.

Daar was geen teken van gedwonge toegang nie en die slaapkamerkluis was oop en leeg, het insp. Diana Fransman, polisiewoordvoerder in Paarl-Oos, ge­sê.

Niemand is nog in hegtenis geneem vir die jongste voorval nie óf vir ’n rooftog verlede Saterdag toe Abrahams ná werk deur vier gewapende mans oorval en van ’n bedrag van R10 000, sy selfoon en Toyo­ta Yaris beroof is nie.

Sy voertuig is daarna verlate in Mbekweni in die Paarl gevind.

Hy het nie verdien om só te sterf nie, het me. Anthea Abrahams, een van sy dogters, in trane gesê. “Niemand het die reg om iemand anders se lewe te neem nie. Hy het nog baie planne gehad.”

Sy het haar pa, wat alleen gewoon het, beskryf as ’n toegewyde en hardwerkende sakeman wat altyd besig was.

Hy was nie net ’n suksesvolle eiendomsontwikkelaar nie, maar het ook ’n sukses gemaak van enigiets van die pekel van olywe tot bierbrouery. Onder sy nalatenskap tel die Ivanhoe Park-kompleks, die Abrahams-supermark (tans Essop’s en een van die eerste ontwikkelings in Paarl-Oos), die Charleston Hill- en die Mayfred’s-supermark, en ’n blok woonstelle in dieselfde gebied.

Mnr. Abrahams was baie aktief in die kerk en op maatskaplike gebied. Hy het gedien in die kerkraad van die Annunciation-kerk, wat hy in die apartheidsjare in Paarl-Oos help oprig het. Hy was ook lid van die Boland Traders’ Association, wat in dieselfde tyd geldelike hulp verskaf het aan jong mense wat opgesluit is.

Hy word oorleef deur sy gewese vrou, Mary, vyf van sy ses kinders – Adré, Deidré, Frederick, Anthea en Ivanhoe – 12 kleinkinders en twee agterkleinkinders. Hy word Saterdag om 09:00 uit die Annun­cia­tion-kerk in Paarl-Oos begra­we.

Enigiemand met inligting kan speurinsp. Elton Abrahams by 021 877 5900 bel.