Kaapstad. - Boodskappe van medelye het gister ingestroom vir die legendariese Suid-Afrikaanse sanger Miriam Makeba, oftewel “Mama Afrika”, wat eergisteraand in Italië dood is.

Dr. Nkosazana Dlamini-Zuma, minister van buitelandse sake, het uit Brussel namens pres. Kgalema Motlanthe en die regering met die Makeba-familie gesimpatiseer. Sy het Makeba onthou as een van die “grootste sangers van ons tyd”.

“Miriam Makeba het regdeur haar lewe, deur sang, ’n positiewe boodskap aan die wêreld oorgedra oor die stryd van Suid-Afrikaners en die gewisse oorwinning oor die donker magte van apartheid-kolonialisme.”

Mnr. Jacob Zuma, ANC-leier, het Make­ba as ’n “onvermoeide patriot van Afrika” beskryf wat haar talent in diens van die mense en die bevrydingstryd in Suid-Afrika en die vasteland gebruik het.

Oudpres. Thabo Mbeki het ook hulde gebring aan haar uitsonderlike musikale en menslike kwaliteite. “Sy was ’n unieke sanger wie se musiek inspirerend was en herinner het aan menslikheid en die plig teenoor ander men­se.”

Emeritus-aartsbiskop Desmond Tutu het gesê die dood van die “nagtegaal” is ’n groot verlies vir Suid-Afrika en die wêreld.

“Ons sal haar aangrypende stem onthou toe sy ‘Back of the Moon Boys’ in die musiekblyspel King Kong gesing het. Ons moet altyd onthou hoe Harry Belafonte in die VSA haar mentor was, maar dit sou niks beteken het as sy nie geseën was met só ’n stem nie. Ons wêreld was ’n bie­tjie beter vanweë haar serenade en ons is armer weens haar dood.”

Me. Desiree van der Walt, DA-LP, het namens die party hul skok en medelye aan Makeba se familie betuig. “Ofskoon die tragiese en onverwagse heengaan van Afrika se mees gevierde dogter deur alle Suid-Afrikaners en die vasteland betreur word, kan ons dalk ’n mate van troos put uit die wete dat sy voortgegaan het om diegene rondom haar tot die einde met haar stem te seën.”

Die leier van die OD, me. Patricia de Lille, het gesê: “Miriam het aanklank gevind by jonk en oud en haar aktivisme as ’n sanger wat oor ware kwessies gesing het, kan met moeite deur ander sangers nageboots word.”

Me. Pat Lebenya-Ntanzi, waarnemende voorsitter van die IVP-jeugbrigade, het Makeba as ’n groot Suid-Afrikaanse held, ’n ikoniese figuur, aktivis, wêreldbekende musikant en ’n passievolle, talentvolle mens beskryf.