KAAPSTAD. – Tendense in die Wes-Kaapse bevolkingsgroei wat die demografie van die kiesersrol verander, suggereer dat die ANC die 2009-provinsiale verkiesing kan wen.

Só skryf mnr. Jonathan Faull, navorser by die Instituut vir Demokrasie in Suid-Afrika (Idasa), in die nuutste uitgawe van die tydskrif Focus wat deur die Helen Suzman-Stigting gepubliseer word.

Volgens Faull dui syfers van Statistieke Suid-Afrika (SSA) daarop dat in die tydperk 2001 tot 2006, die Wes-Kaapse bevolking met 16,7% gegroei het – meer as dubbel die nasionale gemiddelde van 8,2% en hoër as enige ander provinsie.

Syfers van SSA dui ook daarop dat die Wes-Kaap, naas Gauteng, oor dieselfde tydperk die tweede hoogste proporsie interprovinsiale immigrante (36 1476) ontvang het. Die helfte hiervan het uit die Oos-Kaap gekom.

“Die tendense in die bevolkingsgroei verander noodwendig die demografiese aard van die Wes-Kaapse kiesersrol.”

Faull skryf dat die provinsiale bevolking met 14,3% oor die tydperk 1996 tot 2001 gegroei het – die swart bevolking het met 46% gegroei, die bruin bevolking met 13,6% en die wit bevolking met 1,38%.

“Gegewe die ANC se amperse monopolie op swart stemme in die provinsie, is dit ’n goeie teken vir die regerende party en plaas dit die kollig op die glasplafon van die DA-projek as hy voortgaan om staat te maak op die minderheidstemme in die provinsie en só skitterend misluk om vordering te maak onder die swart kiesers.”

Die uitdaging vir die ANC oor die komende 15 maande, is om die provinsiale kongres wat vir Junie geskeduleer is, met min rugstekery te benader en om lede op voetsoolvlak en die alliansie te verenig.

“Dit is onwaarskynlik, maar as die opposisie-opkoms voortgaan om soos in die 1999- en 2004-verkiesings te stagneer en die swart opkoms bly konstant, suggereer die demografiese veranderinge dat die ANC die verkiesing redelik maklik behoort te wen.”

Volgens Faull suggereer vorige verkiesings dat die massabasis van die ANC in algemene verkiesings baie min omgee vir die kleinlikheid van hul provinsiale politiek. Hulle daag op by die stembus ten spyte van skermutselings by die provin­siale hoofkwartier, wat ’n goeie teken is vir die ANC.

Die uitdaging is drievoudig vir die DA – verenig die opposisie, verhoog die opkoms van kiesers vir minderheidspartye en wen swart stemme.

“Die DA sal sy veldtog spesifiek teen die OD moet voer en teen ander opposisiepartye – sonder om die moontlikheid vir onderhandeling van ’n koalisieregering as daar geen volstrekte meerderheid is nie – te ontken.” Die sleuteluitdaging vir die DA is om swart stemme by die ANC te wen.