JOHANNESBURG. – Die motor-van-die-jaar-trofee vir 2008 pronk vanjaar in Mazda se kas.

Mazda se Mazda2-model is gister op ’n deftige geleentheid by die ­Theatre on the Track in Kyalami as die Suid-Afrikaanse motor van die jaar aangewys. Deur te wen, het die klein Mazda2 agt ander finaliste uitgestof, waaronder die Mazda5.

Die spesifieke model wat aan die kompetisie deelgeneem, en gewen het, is die Mazda2 1,5 Individual.

Dit is vanjaar die 23ste jaar wat dié kompetisie deur die Suid-Afrikaanse Gilde vir Motorjoernaliste en Wesbank aangebied word.

Mazda het vanjaar die trofee vir die eerste keer gewen, maar die Ford Motormaatskappy (Mazda se moedermaatskappy) het dit al twee vorige kere – met ’n Ford Fiesta en ’n Volvo S40 – gewen.

Die Motor van die Jaar word elke jaar uit ’n kortlys van finaliste gekies. Die finaliste self word deur die gilde gekies uit alle nuwe motors wat in die 12 maande voor ’n spesifieke afsnytyd bekend gestel is. Vanjaar was daar meer as 220 afsonderlike modelle waaruit die finaliste gekies kon word.

Die Suid-Afrikaanse motor-van-die-jaar-kompetisie verskil wesenlik van soortgelyke kompetisies in ander wêrelddele, aangesien elke finalis deeglik deur gildelede getoets word. Die toetse sluit in dinamiese toetse, ’n vergelyking met die voertuig se mededingers (en nie ander finaliste nie) en statiese toetse waar gebruikersvriendelikheid en gehalte getoets word.

Die toetse is vanjaar by Gerotek, buite Pretoria, gedoen.

Mazda neem die trofee oor van die Honda Civic 1,8 VXi wat verlede jaar gewen het.

Die ander finaliste vanjaar was die Mazda5 2,0 Active, Nissan Qashqai 2,0 Acenta, Fiat Bravo 1,4 T-Jet Sport, Toyota Corolla 1,8 Exclusive, Honda CR-V 2,2 I-CDTI, Land Rover Freelander 2,2 HSE, Mercedes-Benz C220 CDI Elegance en Lexus LS460.