ORANIA. – Die Vryheidsfront Plus het ’n veldtog begin om deur aktivisme oor kwessies soos regstellende aksie en die taalstryd die studenteraad (SR) van die Universiteit Stellenbosch te probeer oorneem.

Noudat die party reeds die meerderheid stemme behaal het in SR-verkiesings by Tukkies, Kovsies en die Tshwane Universiteit van Tegnologie in Pretoria, skuif die visier verder suid.

Anders as bogenoemde drie kampusse, wat tans dikwels deur rasverdelen­de onluste ontwrig word, is die SR-verkiesings op die Matie-kampus tans nie partypolities van aard nie.

Die verpolitisering van die Stellenbosch-kampus is egter op hande, blyk uit verskeie gesprekke wat afgevaardigdes by die VF+ se nasionale jeugkongres op Orania die naweek met Die Burger gevoer het.

Die taktiek waarvolgens die VF+ beplan om sy mag in die Boland te vestig, het op die afgelope naweek se VF+-jeugkonferensie op Orania rugbaar geword.

Dit sal nie met die volkstaat­beleid, wat steeds sentraal tot die VF+ staan, wees dat Maties oorgehaal sal word nie.

Die tipe Afrikaner-volksgebaseerde aktivisme wat so goed in die res van die land gewerk het, is nou Stellenbosch se voorland.

Uit mededelings die afgelope naweek op Orania blyk dit dat een van die VF+ se voorste jong organiseerders, mnr. James Kemp, reeds uit Pretoria in die parlementêre kantoor ontplooi is, en dat hy sukses by Maties as een van sy voorste prioriteite beskou.

Hulle weet dit kan ’n lang, opdraande stryd wees, maar hulle sê Maties kan eersdaags al die nuwe “aktivisme” voel.

Enkele Maties was selfs die ­naweek by Orania teenwoordig, waar hulle gasvry onthaal is, na die rock-groep Klopjag geluister het en Saterdagmiddag drie mosies aanvaar het wat op “vryheid” (vir die Afrikaner) gefokus is.

Sommige afgevaardigdes was openlik uitgesproke teen Adam Tas, die nierassige studentevereniging wat hom vir die belange van Afrikaans op die kampus be­ywer.

Die kongres, wat deur sowat honderd jeug-afgevaardigdes bygewoon is, is Saterdagoggend deur dr. Pieter Mulder, leier van die VF+, geopen met ’n vraag-en-antwoordsessie waarin onder meer verskille en ooreenkomste met die DA ter sprake gekom het.

Mulder het ook uitgewei oor die noodsaaklikheid dat opposisiekiesers hulle vir aanstaande jaar se algemene verkiesing re­gistreer, want elke opposisiekieser wat wegbly, gee sy stem proporsioneel aan die ANC.

Mnr. Cornelius van Rensburg, landwye jeugleier van die VF+, het in sy toespraak uitgevaar teen die regering en die huidige politieke bedeling. Hy meen Afrikaners was die land se eerste vryheidsvegters.

Hy het aangevoer die Afrikaner is tans magteloos teen die regering. “Hoe vry is ek as ek geen vooruitsigte vir werk in Suid-Afrika het nie omdat ek wit is? Hoe vry is ek as ek weens velkleur nie toelating tot mediese studies kan kry nie, maar swart studente met gemiddeldes onder 60% word toegelaat? Hoe vry is ek as regeringsbeleid bepaal saam met wie ek in ’n koshuis kan bly?”