Toyota se nuwe iQ, die wêreld se kleinste viersitplekmotor, het met sy innoverende ontwerp verskeie groter motors uitgestof in die Japanse Motor van die Jaar-kompetisie.

Dié kompakte luikrug van net 2,9 m het volpunte gekry van 39 van die 65 jurielede. Hy het sy naaste mededinger, die Citroën C5, met 303 stemme geklop en 526 punte aangeteken.

Verbasend genoeg het die indrukwekkende Nissan GT-R, met sy verbysterende versnelling en aantreklike prys, derde geëindig. Hy het ook die toekenning vir die mees gevorderde tegnologie ontvang.

Die Honda Freed en die Subaru Exiga is onderskeidelik as die beste waarde vir geld en die meeste pret aangewys.

Toyota se oorwinning verteenwoordig die algemene neiging onder vervaardigers om weg te beweeg van groot, luukse verrigtingsmotors na klein, ekonomiese en omgewingsvriendelike motors.

Die iQ word volgende jaar in Europa bekend gestel waar Toyota verwag om jaarliks sowat 80 000 modelle te verkoop.

Wat die iQ onderskei van ander mikromotors soos die Smart For­Two, is dat hy sitplek het vir drie volwassenes en ’n kind. Dit is danksy ’n relatief lang asafstand van 2 m en verskeie nuwighede op die gebied van verpakking.

Een hiervan is die ewenaar wat voor die enjin gemonteer is. Dit skep ’n baie kort oorhang voor en laat terselfdertyd meer ruimte in die kajuit.

Die petroltenk, wat net 120 mm dik is, sit onder die voorste sitplekke soos in die Honda Jazz. Die sitplekke het baie dun rugleunings en is van saamgeperste pypstof gemaak om gewig te bespaar.

Nog ’n interessante kenmerk is die instrumentepaneel se asimmetriese ontwerp. Die ontwerpers het die nie-bestuurderskant diep ingekeep sodat die passasier heelwat meer vorentoe sit as die bestuurder. Sodoende is daar meer ruimte agter die sitplek geskep sodat nog ’n volwassene agter die voorste mens kan inpas. Agter die bestuurder se sitplek is daar net plek vir ’n klein kind.

’n Lae swaartepunt en wiele wat op die hoeke gemonteer is sorg vir ratsheid en goeie hoëspoed-stabiliteit. Die veerstelsel bestaan uit McPherson-stutte voor en ’n kompakte wringstaaf agter.

Die iQ sal aanvanklik met ’n 1.0 liter-VVT-i petrolenjin beskikbaar wees wat 51 kW en 91 Nm teen 4 800 r/min. lewer. Gekoppel aan ’n vyfgang-handratkas behaal hy ’n gemiddelde brandstofverbruik van net 4,3F/100 km en ’n CO2-syfer van 99 g/km. ’n Nuwe Multidrive-palwisselende ratkas is opsioneel by die enjin beskikbaar.

Die reeks bevat ook ’n 1.4 liter- D-4D-turbodieselenjin met ’n tussenverkoeler wat 67 kW en wringkrag van 190 Nm teen 1 800 r/min. lewer. Dit is gekoppel aan ’n sesgang-handratkas en lewer ’n gemiddelde verbruik van 4,0F/100 km en ’n CO2-syfer van 103 g/km.

Die iQ se aktiewe veiligheidskenmerke sluit in ABS-remme en elektroniese remkragverspreiding.

Daar is ook stabiliteits- en vastrapbeheer wat die bestuurder help om in ’n noodsituasie beheer oor die voertuig te behou.

Die iQ beskik oor nege lugsakke, waaronder die wêreld se eerste agterruit-gordynlugsak.

Vir ’n motor in dié klas spog die iQ met ’n lang lys standaardtoerusting.

Daar is 15-duim-allooiwiele, elektriese ruite en kantspieëls, lugversorging en ’n CD-speler met ’n sok vir ’n iPod- of MP3-speler. Satellietnavigasie, verhitte halfleersitplekke, sleutellose toegang en outomatiese hoofligte en ruitveërs is in die hoër-spesifikasie-modelle beskikbaar.