Die Voorkamerfest in Darling word vanjaar oudergewoonte in blommetyd van 4 tot 6 September aangebied.

Die Voorkamerfest is uniek in dié opsig dat produksies in huise aangebied word. Plaaslike en ­internasionale kunstenaars neem deel. Besoekers koop ’n kaartjie vir een van sewe roetes en word met munisipale taxi’s na drie verskillende huise in Darling geneem. Hier word aanbiedings van ’n uiteenlopende aard aangebied.

Die artistieke komitee vir vanjaar, die sesde voorkamerfest, het ingesluit Nicolette Moses, Inge Bos en Wim Visser (artistieke ­direkteur van Koninklijke Carré in Amsterdam). Tasha St. John-Reid is die sameroeper in Darling. Hulle is almal sedert die begin van die fees daarby betrokke.

Die name van internasionale kunstenaars word binnekort bekend gemaak. Die plaaslike kunstenaars wat optree, sluit in die saxofoonspeler Dan Shout met The Onion Project en Tyrone Apollis se Geroeste Music.

Die veelbekroonde skrywer, sanger en kabaret-diva Amanda Strydom bring ’n intieme vertoning met die titel Naby uit haar musiekskatkis na die fees.

Sy het verlede jaar haar jongste album, Kerse teen die Donker, in die Koninklijke Carré bekendgestel en vertrek weer in November vanjaar op ’n maandlange toer na Nederland.

Rafiek Mammon en Gary Naidoo bied Let’s Mix It 2.8GLX aan, asook The Fiekie and Willie Show, met Riana Alfreds and Charles Tertiens in laasgenoemde.

Die span van TheatreSports is vanjaar met ’n Fleur du Cap vir hul werk bekroon en gehore sal kan sien hoe daar op die plek teater “gemaak” word.

Die La Rosa- Spaanse Dansteater bied Peter Agulhas in solo-optrede saam met musikante en die solis Lorean Swartz.

Die skrywer, digter en fotograaf Philip de Vos sal van sy bekroonde gedigte en liedere voordra met Tertia Visser-Downie as klavierbegeleier.

Kaartjies is reeds te koop en besprekings vir huisvesting kan ook nou gedoen word.

Inligting oor die kunstenaars is beskikbaar op www.voorkamerfest-darling.co.za. Verblyf kan bespreek word by bookings@voorkamerfest-darling.co.za.