Toneel

First Love

Golden Arrow-teater, ­Baxter

’n Man in ’n broek wat hoogwater sit en deurgetrapte skoene, vertel van sy eerste liefde. Tere liefde was dit nie; dit blyk dat dit vir hom ’n verskrikking was. Dit was moont­lik dan sy laaste amoreuse ervaring as jy hom so uitluister en betrag.

Want dis veral luister wat jy die sowat 70 minute in die Ierse ­akteur Conor Lovett se geselskap wíl doen. Luister veral na die Ierse dramaturg, digter en skrywer ­Sa­muel Beckett se woorde – die eenmanstuk is ’n dramatisering van een van sy vroegste kort­verhale, “First Love”, wat in 1946 geskryf en eers in 1973 gepubliseer is.

Die gegewe wissel van hoogs vreemd tot absurd in ’n bittersoet, humoristiese verhaal van ’n ­ha­we­lose man wat snags op ’n parkbankie slaap, sy erfgeld jare ná sy pa se dood steeds in sy baadjiesak.

Een nag ontmoet hy vir Lulu. Sy eerste liefde. Ons ­vermoed amper dadelik dat sy ’n vrou van die nag is; ons naamlose man sou later dié besef trotseer.

Die beheerste, minimalistiese vertolking van Lovett, luidens sy CV een van die wêreld se grootste Beckett-akteurs, laat Beckett leef – sy taal, andersoortige humor (“the canal flows, if a canal flows”) en ­seker greep op die mens en sy ­dinge. Die beskrywing “groot” pas Lovett as Beckett-vertolker. (Ralph Fiennes was voorheen in sy skoene in dieselfde rol). Dit is net hy op die verhoog en twee ­bankies teen die muur staangemaak. En hy hou die aandag.

Hy vergestalt met groot omsigtigheid ’n episode in die man se ­lewe, ’n besonder menssku man wat erken dat hy in ’n “dispeopled kingdom” woon met net sy ­vertwyfelinge en sy vertwyfelinge oor sy vertwyfelinge as geselskap.

Lovett se liggaamstaal is gepas soos dié van ’n trapsuutjies. Dit is asof hy sy hele liggaam oorhaal vir die volgende beweging, en dit dan steeds huiwerend doen. Sy woorde word net so versigtig geweeg, maar dan sekuur in ons midde ­geplaas. Sy verposings is in ­voe­ling met sy gehoor se moont­like respons.

Lovett en sy regisseur, Judy ­Hegarty Lovett (ook sy wederhelf), het hier ’n tydlose tref-produksie.

)Regie: Judy Hegarty Lovett. Tot 4 Julie.