Rolprent

Welcome to the Sticks

Met Kad Merad.

Jy huil as jy in Bergues aankom en jy huil nóg harder as jy daar weggaan. So sê die inwoners van Bergues – hulle weet, want hulle het al baie mense sien kom en gaan.

In dié Franse dorpie in die koue noorde is daar net ’n arm man se Notre Dame waar inwoners in die klokkespeler se spel die nuwe hoofstuk in sy liefdeslewe kan lees, met een sosiale vergaderpunt – die worsrolletjie kraampie op die plein en regtig nie veel meer nie. Dit is nou as jy blind is vir dit wat eintlik saak maak.

Dit is na die buitepos waar die posmeester Philippe Abrams (Kad Merad) gepos word. Sy slenter om vir homself ’n knus joppie aan die Franse Riviera te bewimpel het hom duur gekos. Julie, sy depressiewe vrou, verseg om hom te vergesel na Bergues, selfs die spietkop laat hom sy oortreding begaan toe hy hoor waarheen hy op pad is.

Die prent kan hier in Suid-Afrika nog meer aftrek kry as jy Frans en die Franse verstaan. Die komedie wentel veral om die mense van die suide (Salonde-Provence) se growwe vooroordele teenoor hul noordelike landgenote, naamlik dat hulle agteraf is, nie behoorlike Frans praat nie en nie gekultiveerd nie.

Plaaslik is dit seker soortgelyk aan Kaapstad wat Slaapstad genoem word en Kapenaars wat as kil afgemaak word deur Noordenaars, en Kapenaars wat Jozi as so ’n lelike plek beskryf. Party van die grappies is ook eg Frans en mis die Suid-Afrikaanse lagspiere. In Frankryk was die prent ’n wegholtreffer, tog is dit in wese die verhaal van ’n man wat leer om sy vooroordele te laat staan.

Philippe knoop in Bergues ’n besonderse vriendskap met die klokkespeler en ook hoofposman, Antoine (’n wonderlike Dany Boon), aan. Dit is hierdie vriendskap wat hom leer om met sy hart en nie sy oë te kyk nie.

Hier is vele kostelike oomblikke soos sy pogings om Antoine te help om sy drankprobleem en sy stukkende hart te oorkom.

Welcome to the Sticks klop met ’n warm hart. Jy gee om vir die inwoners van Bergues – hulle is robuus, boertig en werklik betrokke by mekaar se lewe. Jy verlaat die teater met ’n groot glimlag of jy nou Frans is of nie.

) Ouderdomsperk: 13TV. Tydsduur: 104 minute.